Clarkson's Farm- Amazon prime वर प्रसिद्ध असलेली शेतीची
वेबसिरीज
क्लार्क्सन फार्म या वेबसिरीज आतापर्यंत ३ सीजन आले. Amazon prime असणाऱ्या या वेबसिरीज चे IMDb रेटिंग हे ९/१० आहे. जगभर लोकप्रिय झालेल्या या वेबसिरीजचा बाज हा डोक्युमेंट्रीचा आहे. कुठलीही स्क्रिप्ट नाही कोणी कलाकार नाही, खऱ्याखुऱ्या शेतकऱ्यांनी, वर्षभर शेतावर चालणाऱ्या गोष्टींना शूट करून रिलीज केले. पण हे तेवढेही सोपे नव्हते. कारण हा शेतकरी साधासुधा माणुस नव्हता. इंग्लंड मधील जेरेमी क्लर्क्सन हा साठीतील सेलिब्रेटी जो बीबीसीचा पत्रकार, ब्रिटनच्या टीव्ही प्रोग्रामचा प्रसिद्ध निवेदक, कार रेसिंगचा ड्रायव्हर, मुलाखतकार, आणि विविध रियालिटी शोजचा सेलिब्रेटी. त्याने ब्रिटनच्या उत्तरेकडील ग्रामीण भागात १००० एकर शेती घेऊन त्यावर शेती करायला सुरवात केली. त्याला शेतीची काहीच माहिती नव्हती. स्थानिक मंडळींच्या मदतीने त्याने शेतीला सुरवात केली. ज्या वर्षी सुरवात केली त्याच वर्षी कोरोना आला.
शेतीची सुरवात tractor घेण्यापासून झाली, पुढं जावून गरजेची औजारे घेतली. शेतीचे नियम, कायदेकानून समजून घेतले. स्थानिक मजूर, शेती प्रशासन, शहर प्रशासन यांच्याशी जुळवून घेतलं. त्यांच्याकडून शिकू लागला. एक वर्ष, १००० एकर शेतीत काम केल्यावर त्याची शिल्लक होती फ़क़्त १५० डॉलर. आणि तरीही मी शेती करत राहणार असा चंग बांधून तो काम करू लागला. २०२१ पासून सुरु केलेली शेती तो आजही करत आहे. पण मुळचा टीव्ही क्षेत्राशी कार्यरत असल्याने त्याला एक भन्नाट आयडिया आली. त्याच्यासाठी हे शेती करणं म्हणजे नेहमीपेक्षा काहीतरी वेगळं होतं. त्याचे डॉक्युमेंटेशन करावे असे त्याला वाटले. क्लर्क्सनने शुटींगच्या टीमला बोलावले आणि जे काही सुरु आहे त्याचे शुटींग घ्यायला सांगितले. शेतीत घडणाऱ्या गमतीजमती, मजा, फजिती, काही आनंदाचे तर काही भावनिक क्षण असं सगळंच शूट झालं. मग त्यात स्वतः क्लर्क्सन निवेदक बनला, त्याची आयरिश मैत्रीण कि जी अभिनेत्री आणि पटकथा लेखक आहे, ती त्याला शेतात मदत करायला आली. स्थानिक tractor ड्रायव्हर कलीब कुपर कि जो त्याला शेतकामाला मदत करायचा तो, त्याचा जिगरी बनला. बांध बंधीस्ती करण्यात माहीर असेलला, गेराल्ड त्यांच्या गटात सामील झाला, स्थानिक land एजंट कि जो त्याचा सल्लागार पण होता असा चार्ली त्यांच्याशी जोडला गेला.
२०२१ मध्ये क्लर्क्सन फार्म या वेबसिरीज चा पाहिला सीजन रिलीज झाला आणि लोकांनी तो अक्षरशः डोक्यावर घेतला. क्लर्क्सन, त्याची शेती आणि त्याचे मदतनीस सगळे रातोरात सेलिब्रेटी बनले. क्लर्क्सन आणि लिसा आधीपासूनच सेलिब्रेटी होते. खरा बदल झाला तो कलीब, गेराल्ड आणि चार्ली च्या आयुष्यात. त्यातल्या त्यात कलीबच्या. कारण कलीबचा कामाच्या निमित्ताने जास्त संपर्क यायचा, त्यामुळे वेबसिरीज मध्ये तो दिसलाही जास्त आणि त्याहीपेक्षा त्यांची तू तू मै मै बघायला मजा येते. क्लर्क्सनचा ह्युमर अफलातून आहेच पण कलीब सुद्धा त्याला पुरून उरतो. त्या दोघांमधील बंध बघायला छान वाटतात. कलीब ने तर ३-४ पुस्तकं लिहिली कि जी बेस्ट सेलर झाली. क्लर्क्सन ने सुद्धा त्याचा शेतीचा अनुभव शब्दबद्ध केलाय.
त्यांनतर आलेल्या २ सीजन मध्ये अजून मजा वाढत गेलीय. मी या वेबसिरीज चे तीनही सीजन पाहिले आहेत. त्यातील सर्वच गोष्टी इथं सांगून तुमची उत्सुकता कमी करणार नाही. एकदा तुम्ही बघायला सुरवात केली तर अपोआप त्यांच्या सोबत आपण प्रवास करू लागतो. आपले मनोरंजन जरी होत असले तरी या निमित्ताने युरोपातील शेतीचे चित्र बघायला मिळते. शेतीकडे बघण्याचा दृष्टीकोन कळतो. शेतीचे सौंदर्य, स्थानिक जागरूकता आणि शेतीच्या वैश्विक आव्हानांची प्रचीती सारखी येत राहते.
Clarkson’s Farm Season-1 link - https://www.primevideo.com/detail/Clarksons-Farm/0SHGKA0J8D4G01ZGD647627NEJ
Clarkson’s Farm Season-2 link - https://www.primevideo.com/detail/Clarksons-Farm/0HXBV30J672YHO5G6L7TPEO44R
Clarkson’s Farm Season-3 link - https://www.primevideo.com/detail/Clarksons-Farm/0HO8ENK0AIDHSLMA7DJV43S6YS
मनोज हाडवळे
पराशर कृषी व संस्कृती पर्यटन
